(ආර්යයන් වහන්සේලා දැක නැත.)
මෙය පෘථග්ජන පුද්ගලයාගේ ලක්ෂණයයි. ආර්යයන් වහන්සේලා යනු ක්ලේශයන්ගෙන් දුරු වූ උතුමෝය. දෙවියන් සහිත ලෝකයා විසින් පූජා සත්කාර කරනු ලබන බුදුරජාණන් වහන්සේලාද, පසේබුදුරජාණන් වහන්සේලාද, මාර්ගඵලලාභී බුද්ධ ශ්රාවකයෝද ආර්යයන් වහන්සේලා යැයි කියනු ලබති. විශේෂයෙන් බුදුරජාණන් වහන්සේටද ආර්යයන් වහන්සේ යන වචනය යොදනු ලබයි. ඒ බව සංයුත්ත නිකායේ සඳහන් වන දේශනාවක ඇතුළත්ය. එම දේශනාව මෙසේය:
"මහණෙනි, දෙවියන් සහිත වූ, මරුන් සහිත වූ, බ්රහ්මයා සහිත වූ දෙව් මිනිස් ප්රජාවෙහි තථාගත සම්මා සම්බුදුරජාණන් වහන්සේ ආර්ය නමින් හැඳින්වෙති." (සච්ච සංයුත්තය)
එසේම චතුරාර්ය සත්ය ධර්මය අවබෝධ කොට වදාළා වූ සෙසු මාර්ගඵලලාභීහුද ආර්ය යන නාමයෙන් හඳුන්වති. අන්ධබාල පෘථග්ජනයා මෙම ආර්යයන් වහන්සේලා දැක නැත. මින් අදහස් කරන්නේ ඇසින් දැක නැත යන අර්ථය නොවෙයි; ඥාන චක්ඛු නමින් හඳුන්වන නුවණැසින් දැක නැත යන අර්ථයයි.