පොත් ලැයිස්තුව

"අය මේව කෝ අරියෝ අට්ඨංගිකෝ මග්ගෝ, සෙය්‍යථිදං: සම්මාදිට්ඨි, සම්මාසංකප්පෝ, සම්මාවාචා, සම්මාකම්මන්තෝ, සම්මාආජීවෝ, සම්මාවායාමෝ, සම්මාසති, සම්මාසමාධීති."

කාටත් ඉතා හොඳින් හුරුපුරුදු ඉහත සඳහන් පාලි පාඨය බොහෝ සූත්‍ර දේශනාවල දක්නට ලැබේ. එම පාලි පාඨය තුළින් ආර්ය අෂ්ටාංගික මාර්ගය පැහැදිලි කර දී තිබේ.

සම්මාදිට්ඨි, සම්මාසංකප්පෝ, සම්මාවාචා, සම්මාකම්මන්තෝ, සම්මාආජීවෝ, සම්මාවායාමෝ, සම්මාසති, සම්මාසමාධි යන අංග අටකින් යුක්ත වූ එම මාර්ගයම නිවන් මාර්ගයයි. අතීත බුදුවරුන් විසින් සොයාගන්නා ලද මාවතෙහි ගමන් කොට, අතීතයෙහි බොහෝ බුද්ධ ශ්‍රාවකයෝ සියලු කෙලෙසුන් නසා නිවන් පුර වැඩම කළහ. බුදු කෙනෙකුගේ ශාසනය අවසන් වීමෙන් පසු එම මාර්ගය වැසී යන්නේය; නැවත එම මාවත සොයා ගන්නේ බුදු කෙනෙකු විසින්මය.